صباح 1.9 مميز بشكل خاص عالعائلات الي فيها أطفال باول سنواتهم الدراسية، ببدا باواعي جديدة معلمات وصفوف جداد , فيو مشاعر ملخبطة للاهل والاطفال,دموع , فراق , لعب وفرح وأصحاب جداد دوامة مشاعر بتشغل كل الحواس .
عنا كان شوي غير.. حبينا نشغل حاستين بمتعة حاسة النظر والشم ونبدا نهارنا بالمخبز ليتعرف ايليا على كيف منعمل منقوشه بزعتر ناخدها معنا زوادة لنهارنا .
بشدد منهج التربية منتسوري , واحد من المناهج الي راح نحكيلكم عنها كتير , على إعطاء الطفل الحرية حرية اللعب , حرية الاكتشاف , حرية الحركة وغيرها بس طبعا هاي الحريات لازم تكون بإطار بيئة معدة ومجهزة لاكتشاف الطفل لحتى ما نعرضه للخطر , إيمانا منا بأهمية الحرية قررنا نبدأ اول يوم بالسنه الدراسيه باللعب مع ايليا بالحديقة العامه .
قصدنا نعطي ايليا حرية كاملة باختيار الألعاب وحرية اختيار طريقة اللعب بالألعاب الموجودة بدون قوانين بدون شرح حتى نساعد على بناء شخصية قيادية , مستقلة ومبدعة ومش شخصية تنتظر التعليمات لتنفيذها وإرضاء الآخرين
جربنا نصور صور كتيرة لإيليا وهو عم يلعب ويكتشف الالعاب استنادا على مبدأ المراقبة وتسجيل تفاعل الطفل لحتى نتابع تطوره وننتبه لاهتماماته ونقدر نختار فعاليات محببة عليه المبدأ مأخوذ من طريقة ريجو اميليا للتربيه .
بعد الضحك واللعب والتعب بالحديقة روحنا عبيتنا و اخد ايليا قيلولته الي عادة بتكون كتير قصيرة
بعد القيلولة ,وبما انو 1.9 رحنا زيارة عالمكتبه لنختار قصة لايليا , الهدف من القصة كان شرح لايليا عن عيد ميلاده الي باقي عليه 18 يوم .
القصة الي اخترناها وعن أهمية القراءة للطفل راح نشارككم بمقال تاني .
Comments
Post a Comment