واحدة من جوانب ذكاء الطفل الذكاء الموسيقي... لهيك مهم جدا للطفل انو ينكشف على الموسيقى بأنواعها المختلفة من جيل صغير جدا ليطور هذا النوع من الذكاء.
عشان ينكشف عليها المفروض أنا نوفرو البيئة الملائمة لهيك ان كان من خلال نقوم بتسميعه الموسيقى من خلال اجهزة مختلفة راديو تلفزيون وغيرها ليتعرف على الألحان والطبقات المختلفة من الصوت او يشوف حدا قدامه بيعزفها...
كمان شغلة اللي المفروض الطفل يبدا يعملها من جيل صغيرة انو يحاول يستعمل بنفسه هاي الأدوات والالات الموسيقية ويحاول يجرب لحالو يعمل فيها اللي بدو اياه...
ومهم جدا هاي الالات ما تكون لعبة اللي ما تخرب صوت الالة الحقيقي بعقل الولد... لأن في فرق كثير كبير مثلا بين صوت دربكة وبين صوت دربكة لعبة ... أو بين صوت جيثارة وبين صوت جيثارة لعبة وبين صوت بيانو وبين صوت بيانو لعبة.
تجربتنا مع ايليا بمجال الموسيقى بديت من لما انولد... كنا نحاول دائما نخليه يسمع موسيقى كلاسيكية على اختلاف انواعها ولما بدي يقدر يتحرك صرنا نجبلو أدوات موسيقية حقيقية يلعب فيها وكل ما كان عنا فرصة نكون موجودين بمكان فيه عازف نحاول نخليه يقرب عالعازف ويشوف كيف الصوت واللحن بيطلع من الالة اللي بيعزف عليها... ولما كان في عنا فرصة ونكون ببيت شخص عندو بيانو بما انو احنا ما كان عنا فكنا نسمح لايليا يستعملو ويكبس عليه ويطلع أصوات... ايليا كان كثير يتحمس ويصير بدو اكثر واكثر...
بعيد ميلاده السنة حبينا نوخد الاشي لمحل مرتب باطار معين فطلبنا من المعهد الموسيقي بعبلين يستقبلو ايليا ليتعرف على الالات الموسيقية من عازفين ويتذوقها بشكل اسبوعي ... وكان اول لقاء الو مع معلمة اكثر من رائعة واتحمس كثير وهذه صور وفيديو من اللقاء الاول بالمعهد الموسيقي.
احكولنا عن تجاربكم بالموسيقى مع اطفالكم
Comments
Post a Comment