لما الله اعطاني نعمة الامومة كتير اشياء صار الها معنى مختلف .. قبل الولادة حضرت حالي كتير وقرأت كتير عن التغييرات الجسدية والنفسية الي بتمرق فيها الام .. ومن طبيعتنا كبشر منهمل التغييرات الي منشوفها صغيرة متل اليوم يوم تبعنا الي تغييره لا يقل باهميته وتاثيره عن التغييرات الي مننسبلها اهمية كتير وملاقي عنها كتب ومقالات ..
وحدة من الشغلات الي كتير بسيطة الي تغيرت بحياتي كتير كانت الطلعات , المشاوير حتى ابسط المشاوير بعد ما كانت ممتعة عفوية وسريعة تحولت لاشي الي محتاج تخطيط وتحضير وملان تحدي ولانشغالي بامور كتيرة متل كل ام جديدة كنت اعطي الاولوية للامور "الاهم" لحد ما صرت حبيسة البيت وقررت بتشجيع من زوجي اخوض التحدي العظيم واطلع انا وايليا لاول مرة لحالنا بجيل 3 اشهر ورحنا سوى عالمجمع التجاري ( الكيريون) , اليوم لما اتذكر الهواجس والتخبطات الي عشتها بالطريق للمجمع بترتسم عوجهي ابتسامه مترين .. قديش احنا الامهات غريبات بتخوفاتنا وهواجسنا ..
مشوارنا كان حلو بالرغم من انا احتجنا لاستراحة بالطريق الي مدتها 20 دقيقة لاهدي ايليا بعد نوبة بكاء وبالرغم من انه قضيت اكتر من نص ساعة (بالمجمل) من المشوار بغرفة الرضاعة الا انه هالمشوار حررني وكسر هواجسي وكان نقطة بداية لامومه احلا وامتع
بحب انهي هالبوست بمقولة قرأتها " تراكم التفاصيل الصغيرة يبني الحدث الكبير " , لا تهملي التفاصيل الصغيرة بيومك لانها اعمدة نجاحه وتحويله لافضل
Comments
Post a Comment